இப்படியும் பார்க்கலாம் சார் -2

முதல் பாகம் இங்கே கிளிக் செய்யவும்.


சார்,

கெடா வெட்டினால் கைது செய்வார்கள் என்பதை எதற்கு சொன்னேன் என்றால் உங்கள் தனிப்பட்ட இன அடையாளம் இங்கே அழிக்கப்படுகிறது. ஏண்டா கண்ணு ,கெடா வெட்டினா போலீஸ் பிடிக்குமாமேன்னு எங்க தாத்தா கேட்டா அவருக்கு நான் பகவத் கீதை கிளாஸ் எடுத்தா விளக்க முடியும்? அல்லது அவருக்கு அது புரியுமா ?

அவ்வளவு ஏன்?

உங்க "என் பைபிள்" பதிவுக்கு வருவோம் . நான் தான் அநாச்சாரம். ஒரு குப்பனோ சுப்பனோ, கோவிந்தனோ உங்களிடம் வந்து ஐயா,உங்கள் பைபிள் பதிவை நீச மொழியான தமிழில் படித்தேன், எனக்கு பிடித்திருந்தது .நானும் பரிசுத்த ஆவியான ஏசுவை ஏத்துக்கிறேன்னு சொல்றான்னு வைங்க. நீங்களும் அவனை சர்ச்க்கு கூட்டிட்டு போய் பாப்டைஸ் செய்து பிலிப் கோவிந்தன்னு பெயரை மாத்தி விடறீங்க. அடுத்த நாள் காலைல ஜோசப் மதமாற்றம் பண்றார்னு போலீஸ் வந்து உங்க வீட்டு முன்னாடி நிக்குதுன்னு வைங்க.

எப்படி இருக்கும் சார்?

சத்தியமா அன்னைக்கு ஒரு திராவிட ராஸ்கல்தான் உங்களுக்கு உதவியா வருவான். "தேசியவியாதி" (கொத்ஸ் கவனிக்க) வரமாட்டான்.

தெரியாமத்தான் சார் கேட்கிறேன.தமிழ்ப்பற்று இருப்பது அவ்வளவு கேவலமான விஷயமா?

தொல்காப்பியம் இரண்டாயிரம் வருடத்திற்கு முன்பு எழுதப்பட்டதாக சொல்கிறார்கள. அதில் அவ்வளவு இலக்கணம் எழுதியுள்ளான் என்றால் மொழி எப்போது தோன்றியிருக்கும் அந்த மொழியோட வாரிசு சார் நம்பள்ளாம். எவ்வோ பெரிய விஷயம். .பெருமைப்படுங்க.இந்தியோட வயசு என்ன?இன்றைய இந்தியாவில் இந்தி இல்லாமல் வாழ்வது ஒரு பிரச்சினையே இல்லை என்பதை ஒத்துக்கொள்கிறீர்களா ?

இந்த தமிழ்மொழிதானே நம்மை சேர்த்தது. அமெரிக்கா ,லண்டன், இத்தாலி, சுவீடன், கிரீஸ் என்றெல்லாம் உலகம் முழுவதும் இருந்து நம்ப பிளாக்கை யார் படிக்கிறார்கள்? தமிழர்கள் தானே. நீங்கள்ளாம் இங்கிலீஷ் பிளாக் வைச்சு வெள்ளைகாரனை படிக்க வைக்கறீங்க.எனக்கெல்லாம் இங்கிலீஷ் தெரியாது. தமிழ்தான் தெரியும்.

கிறிஸ்தவன்,இஸ்லாமியன் என்றெல்லாம் மதரீதியான பிரிவினை இருந்தாலும் நம்மை முதலில் சேர்ப்பது மொழிதான். எங்கயோ வடஇந்தியாவோ அல்லது வெளிநாடோ போறீங்க.தமிழ் யாராவது பேசகேட்டா உங்களுக்கு என்ன தோணுது?

செத்துப்போன மொழியான சம்ஸ்கிருதத்தை இன்னமும் தேவபாசைன்னு பேசற "தமிழர்களும்" இருக்கற இடம் தான் இது. இவங்களுக்கு சம்ஸ்கிருதம் எழுதவும் படிக்கவும தெரியாது.ஆனாலும் இது தேவபாசை என்பார்கள் . தமிழ் காட்டுமிராண்டி பாசை என்று பெரியார் சொன்னாரே என்பார்கள்.அங்கேதான் பெரியார் ஞாபகம் வரும் இவர்களுக்கு.

சரி.விடுங்க.மொழியில் எமோஷன்ஸ் வேண்டாம் . மொழி எப்படி தோன்றியிருக்கும் என்று அறிவியல்பூர்வமாக வருவோம்.அப்படி பார்த்தாலும் சம்ஸ்கிருதம் எப்படி தேவ பாசை ஆச்சு? கடவுள் அந்த மொழியில் பேசினாரா? இதை இந்த இடத்தில் நிறுத்துவோம்.இது மேலும் நீட்டினால் பிரச்சினை ஆகும் .என்னால் ஆகாது சாமி.

இன்று உலகம் முழுவதும் இனம்,மொழி என்று அவனவன் அவனுடைய வேரை தேடறான் சார்.அதில் பெருமையடையறான். ஆனா நாம தாழ்வு மனப்பான்மையில் புழுங்கறோம்.

ஏன் தாழ்வு மனப்பான்மை வந்தது? மொழியை பற்றி இனத்தை பற்றி பேசுதல் கேவலம் என்று கட்டமைக்கிறார்கள். அதாவது உங்கள் மொழியையும் இனத்தையும் பற்றி பேசுவது மட்டுமே இங்கு கேவலமாக கட்டமைக்கப்படுகிறது.அடுத்த மொழியைப்பற்றி அழிக்க முயற்சி செய்பவர்கள்தான் வெட்கப்படவேண்டும் .நாம் ஏன் படவேண்டும் வெட்கம்?ஆனால் நம்மை ஆள்பவர்கள் வேறு மாநிலத்தவர் என்பதில் பெருமை கொள்கிறீர்கள் நீங்கள்?

நீங்க இங்க ஒரு மிகப்பெரிய முன்னுதாரணம் சார். உங்கள் பதிவில் நீங்கள் எழுதும் அனுபவங்களை பார்த்து இங்கு பலரும் பிரமிக்கிறோம்.உங்களிடம் பலநேரங்களில் மோதிய ஊர் பெரிய மனுசர்கள், மனநிலை சரியில்லாத வாடிக்கையாளர்கள், மேல்சாதியினர், கீழ்சாதியினர் ஆகியோரை நீங்கள் ஒவ்வொரு முறையும் அவர்களுக்குரிய மரியாதையை கொடுத்தே டீல் செய்துள்ளீர்கள்.ஆனால் கருத்து தளத்தில் அதை நீங்கள் எடுப்பதில்லை. உதாரணத்திற்கு சாக்கடை அள்ளுபவர்களை அப்படியே விடுங்கள் என்பதாக ஒருமுறை கூறினீர்கள். நாம் கூடச்சேர்ந்து அள்ளவில்லை என்றாலும் அந்த நிலையை மாற்றவேண்டும் என்று மனப்பூர்வமாக நினைப்பதில் ஒரு கருத்தொற்றுமையை கொண்டு வருவதை உங்கள் கருத்து தடுக்கிறதல்லவா?

அப்படியானால் இந்தியாவின் மேல் மரியாதை உனக்கு இல்லையா என்று தயவு செய்து கேட்காதீர்கள்.எனக்கு என்ன மரியாதை இந்தியா கொடுக்கிறதோ அதே அளவு மரியாதையோ அல்லது அதற்கும் ஒருபடி மேலேயோ நான் எப்போதும் கொடுத்தே வந்திருக்கிறேன். இந்திய தாய் கண்ணீர் விடும் அதே நேரம் தமிழ்த்தாய் கதறுகிறாள். மன்னித்துவிடுங்கள். என்னால் முதலில் தமிழ்த்தாயை தான் பார்க்க்முடிகிறது.

மீண்டும் மீண்டும் சில நண்பர்கள் இந்து மதம் உனக்கு சுதந்திரம் கொடுத்தது என்று கூறி வருகிறார்கள்.இந்தி தெரியாதா ..நீ எல்லாம் இந்தியனா என்று சிலர் கேட்கும் ஆபாச கேள்விக்கு(இந்த கேள்விக்கு நமக்கு குற்ற உணர்ச்சி வந்தால் அய்யோ பாவம் நீங்கள்) இது எந்த விதத்திலும் சளைத்ததல்ல.

அவர்களுக்கு ஒன்று. இந்து மதம் என்று எதை நீங்கள் கூறுகிறீர்கள்? இங்கு முத்துகுமரன், குழலி ஆகியோர் கடவுள் பக்தி உள்ளவர்கள் என்று நினைக்கிறேன்.(உறுதியாக தெரியவி்ல்லை).அவர்கள் தங்களை இந்து என்கிறார்களா? மீண்டும் போய் தங்கமணி பதிவுகளை படியுங்கள்.

இங்கு பொதுவாக ஆதிக்கம் என்றுதான் கூறிஉள்ளேன். தனிப்பட்ட யாரையும் அல்ல. நேற்று இரவு நண்பர் டோண்டுவுடன் ஒரு மணிநேரம் தொலைபேசியப்போதும் இதையே தான் சொன்னேன். டோண்டுவை என்றுமே நானும் என்னுடைய சக திராவிட ராஸ்கல் ஜோவும் பேரன்புடன்தான் அணுகியுள்ளோம்.ஆகவே அது சம்பந்தமாக யாராவது எழுதினால் ட்ராஷ் செய்வேன் என்பதை பேரன்புடன் தெரிவித்துக்கொள்கிறேன்.

இதைத்தான் திராவிட உணர்வுகளின் ஒரு கூறாக நான் முன்வைக்கிறேன்.கருணாநிதி குடும்பத்தை, ராமதாஸ் குடும்பத்தை , திருமாவளவன் குடும்பத்தை தாண்டி இதில் சிந்திக்க வேண்டியது ஏராளம்.இவர்களை எல்லாம் கிண்டல் செய்யும் அறிவாளிகள் இவர்களை கிண்டல் செய்வது போல் கிண்டல் செய்வது இவர்களை இல்லை சார் .நம்முடைய உணர்வுகளை, உரிமைகளை, கருத்துக்களை எல்லாவற்றையும்தான்.

ஆகவே இதில் உள்ள நுண்ணிய அரசியலை பின்நவீனத்துவ நோக்கில் அணுகினீர்கள் என்றால் ( அட..சட். என்னுள் உள்ள அரைகுறை இலக்கியவாதி இப்படி அடிக்கடி எட்டிப்பார்க்கிறான்.மன்னியுங்கள்.)

இதில் உள்ள சில விஷயங்கள் உங்களுக்கு மட்டும் சொல்லப்பட்டதல்ல நானும் ஜோவும் எங்கள் உணர்வுகளை உங்களுக்கு புரிய வைக்க முயற்சி செய்கிறோம். நாங்கள் இளையவர்கள்.ஏதாவது குற்றம் குறை இருந்தால் மன்னியுங்கள் அய்யா.நன்றி.


(கொஞ்ச நாளைக்கு நான் லீவு. பின்னூட்ட பெட்டி திறந்து கிடக்கும்.என் பதில்களை எதிர்பார்க்கவேண்டாம்.விவாதம் செய்பவர்கள் செய்யலாம்)